ខេត្តត្បូងឃ្មុំ: ប្រភពពីមន្ត្រីកងរាជអាវុធហត្ថលោក រ័ត្ន ចាន់ណា កាលពីនៅប្រកបរបររត់តាក់ស៊ីលោក រ័ត្ន ចាន់ណា គឺជាឈ្មួញដឹកជញ្ជូនឈើប្រណីតទៅលក់នៅស្រុកយួនយ៉ាងគគ្រឹកគគ្រេង ហើយបន្ទាប់មកដោយសារលុយកាក់ ដែលបានមកពីរបរដឹកជញ្ជូនឈើប្រណីត ខុសច្បាប់នេះ ទើបជ្រែបានតំណែងជាមន្ត្រីកងរាជអាវុធហត្ថស្នាក់ការសន្តិ សុខលេខ៧០១ ។ ក្រោយពេលក្លាយជាមន្ត្រីកងរាជអាវុធហត្ថស្នាក់ការសន្តិសុខ៧០១ លោក រ័ត្ន ចាន់ណា ប្រើអំណាចជាមន្ត្រីកងរាជអាវុធហត្ថ បន្តប្រកបរបរដឹកឈើនេះរហូតក្លាយជាអ្នកមានទ្រព្យសម្បត្តិស្តុកស្តម្ភ ហើយអាចទិញបានតំណែងជាមេបញ្ជាការរងកងរាជអាវុធហត្ថខេត្តត្បូងឃ្មុំបានយ៉ាងរំភើយ។ ឥទ្បូវនេះលោក រ័ត្ន ចាន់ណាបានប្រើអំណាចរបស់ខ្លួនធ្វើជាខ្នងបង្អែករបស់ក្រុមឈ្មួញ ដឹកជញ្ជូនឈើខុសច្បាប់ទៅលក់នៅស្រុកយួនតាមច្រកព្រំដែនក្នុងស្រុក មេមត់ ដោយមិនញញើតថ្នាក់លើណាម្នាក់ឡើយ សូម្បីតែបទបញ្ជាសម្តេច ហ៊ុន សែន នាយករដ្ឋមន្ត្រីក៏ រ័ត្ន ចាន់ណា មិនខ្វល់ឈឺក្បាលវិលមុខឡើយ ។
ប្រភពពីមន្ត្រីកងរាជអាវុធហត្ថខេត្តត្បូងឃ្មុំមួយចំនួនបានឱ្យ ដឹងថាលោករ័ត្ន ចាន់ណា មេបញ្ជាការរងកងរាជអាវុធហត្ថខេត្តនេះមិនអនុវត្តន៍ឱ្យបានត្រឹមត្រូវ តាមតួនាទីនិងភារកិច្ចរបស់ខ្លួននោះទេ។ ផ្ទុយទៅវិញលោក រ័ត្ន ចាន់ណា កំពុងតែប្រើប្រាស់ស្បែកជាមេរងកងរាជអាវុធហត្ថរកស៊ីដឹកជញ្ជូនឈើ ប្រណីតទៅលក់នៅស្រុកយួនតាមច្រកព្រំដែនក្នុងស្រុកមេមត់ ខេត្តត្បូងឃ្មុំតាមអំពើចិត្ត គ្មានសមត្ថកិច្ចពាក់ព័ន្ធណា ហ៊ានចាត់វិធានការបង្ក្រាបទ្បើយ។ សូម្បីតែលោក ប្រាជ្ញ ចន្ទ អភិបាលខេត្តត្បូងឃ្មុំ និងមេរដ្ឋបាលព្រៃឈើខេត្តនេះ ក៏នាំគ្នា សម្ងំស្ងៀមធ្វើមិនដឹងមិនឮអ្វីទាំងអស់ចំពោះសកម្មភាពដឹកជញ្ជូនឈើ ប្រណីតទៅលក់នៅស្រុកយួនរបស់លោក រ័ត្ន ចាន់ណា មេបញ្ជាការរងកងរាជអាវុធហត្ថខេត្តត្បូងឃ្មុំ។
ឈ្មួញរកស៊ីឈើមួយចំនួនបានឱ្យដឹងថាក្រោយពេលក្លាយជាមេបញ្ជាការរង កងរាជអាវុធហត្ថខេត្តត្បូងឃ្មុំលោក រ័ត្ន ចាន់ណា មិនដឹកជញ្ជូនឈើប្រណីតទៅលក់នៅស្រុកយួនដោយខ្លួនឯងទៀតទេ គឺបានឱ្យអ្នកផ្សេងចេញមុខជំនួស។ អ្នកដឹកជញ្ជូនឈើឱ្យលោក រ័ត្ន ចាន់ណា មានឈ្មោះ លីន និងឈ្មោះ វុធ ឈ្មួញទាំងពីរនាក់នេះដឹកឈើប្រណីតទៅលក់នៅស្រុកយួនតាមច្រកដូង៧ ដើម ច្រកដូនរ័ត្ន ច្រកចាន់មូល និងច្រកជាំក្រវៀង ដោយគ្មានសមត្ថកិច្ចណាហ៊ានប៉ះពាល់ពួកគេនោះទេ។ បញ្ហានេះក្រសួងនិងស្ថាប័នពាក់ព័ន្ធ ជាពិសេសថ្នាក់ដឹកនាំកងរាជអាវុធហត្ថលើផ្ទៃប្រទេសគួរចាត់វិធានការ ទប់ស្កាត់ផងដែរ ដើម្បីកុំឱ្យលោក រ័ត្ន ចាន់ណា ប្រើអំណាចជាមេបញ្ជាការរងកងរាជអាវុធហត្ថខេត្តត្បូងឃ្មុំ ទៅធ្វើជាខ្នងបង្អែករបស់ក្រុមឈ្មួញដឹកជញ្ជូនឈើប្រណីតទៅលក់នៅស្រុក យួនដោយសេរី ដែលបណ្តាលឱ្យខូចកិត្តិយសដល់កងរាជអាវុធហត្ថទាំងអស់ក្នុងប្រទេសកម្ពុជា ៕