ខេត្តរតនគិរី ៖ ឯកឧត្តមទេសរដ្ឋមន្ត្រី លី ធុជ ឯកឧត្តម ម៉េង សក្តិធារ៉ា រដ្ឋលេខាធិការក្រសួងធនធានរ៉ែ និងថាមពល និងតំណាងអង្គការសង្គមស៊ីវិល បានជួបជុំធ្វើសន្និសិទសារព័ត៌ប្រមានជាង២០អង្គភាព ព្រមទាំងអង្គការសង្គមស៊ីវិលជាច្រើនរូបទៀត នៅសាលាខេត្តរតនគិរីនាព្រឹកថ្ងៃទី១៣ ខែមករា ឆ្នាំ២០១៥ ។
ក្នុងឱកាសធ្វើសន្និសិទ្ធសារព័ត៌មាននេះផងដែរ ឯកឧត្តម ម៉េង សក្តិធារ៉ា រដ្ឋលេខាធិការក្រសួងធនធានរ៉ែ និងថាមពល បានថ្លែងអំណរគុណដល់ក្រុមសារព័ត៌មានដែលបានចូលរួមធ្វើសន្និសិទ្ធថ្ងៃនេះ ដើម្បីសិក្សាស្វែងយល់ ពីការគ្រប់់គ្រងវិស័យធនធានរ៉ែ នៅក្នុងខេត្តរតនគិរី ក្នុងបរិបទថ្មីៗនេះ ដែលរាជរដ្ឋាភិបាលបានដាក់ចេញនូវគោលនយោបាយកំណែទម្រង់ស៊ីជម្រៅ លើគ្រប់វិស័យ យើងមានកម្មវិធីការងារក្របខណ្ឌយុទ្ធសាស្ត្រថ្មីៗជាច្រើនដែលតំរូវអោយយើងស្វែងយល់ ទាំងអស់គ្នា ហើយចូលរួមទាំងអស់គ្នាដើម្បីឆ្លើយតប និងការដាក់ចេញរបស់រាជរដ្ឋាភិបាលសំរេចជោគជ័យតាមផែនការដែលបានគ្រោងទុក ។
ឯកឧត្តមបន្តទៀតថា ចំពោះវិស័យធនធានរ៉ែ គឺជាទ្រព្យសម្បត្តិរបស់ជាតិក៏ដូចជារបស់ប្រពលរដ្ឋយើងទាំងអស់គ្នា ត្រូវធ្វើយ៉ាងណាដើម្បីស្រូបទាញផលពីវិស័យធនធានរ៉ែនិង ជាប្រយោជន៏សំរាប់មនុស្សជំនាន់នេះ ក៏ដូចជាមនុស្សជំនាន់ក្រោយទៀត ដូច្នេះការខិតខំនិងការតាមដាន ចង់ដឹងគឺជាកិច្ចដែលត្រឹមត្រូវ ។
ឯកឧត្តមថ្លែងទៀតថា ចំពោះវិស័យធនធានរ៉ែ ក្រសួងបានចុះអាជ្ញាប័ណ្ណអោយក្រុមហ៊ុនស្រាវជ្រាវរុករករយពេលជាង១០ឆ្នាំ មកដល់ពេលនេះបានចេញលទ្ធផលជាផ្លែផ្កាហើយ ដែលយើងដឹងថាមានឥទ្ធិពលរ៉ែបែបណានោះ ហើយខេត្តរតនគិរីក្លាយទៅជាកូនសោគន្លឹះធំមួយសំរាប់ប្រទេសកម្ពុជាយើង គន្លឹះសំរាប់ការអភិវឌ្ឍន៏សេដ្ឋកិច្ចដ៏ធំមួយលើវិស័យធនធានរ៉ែ ។
ខេត្តរតនគិរីគឺមានវិស័យធនធានរ៉ែជាកំរិតអន្តរជាតិមួយ នេះបើតាមការបញ្ជាក់ពីក្រុមអ្នកស្រាវជ្រាវ មានសក្តានុពលធំធេងណាស់ចំពោះរ៉ែ ទង់ដែង រ៉ែមាស និងរ៉ែត្បូងថ្ម ដូច្នេះការអភិវឌ្ឍសេដ្ឋកិច្ចសង្គមរបស់ប្រទេសយើងអាចផុសចេញពីរតនគិរីមុនគេ ទន្ទឹមនឹងនោះដែរយើងត្រូវអភិវឌ្ឍន៏ធនធានមនុស្សអោយមានជំនាញខ្ពស់ផងដែរ ទើបអាចទាញយកផលប្រយោជន៏ទាំងនេះបានកម្រៃខ្ពស់ ម្យ៉ាងទៀតចំពោះបញ្ហារ៉ែ គេបែងចែកជាពីរគឺ រ៉ែសំណង់ មានថ្ម ក្រួស ខ្សាច់ និងរ៉ែលោហ: ។ ឯកឧត្តមលើកឡើងថា ចំពោះរ៉ែសំណង់ក្នុងខេត្តរតនគិរី មានច្បាប់តែបីក្រុមហ៊ុនប៉ុណ្ណោះ នៅក្នុងភូមិសាស្ត្រស្រុកអូរជុំ ក្រៅពីនោះគ្មានច្បាប់នោះទេ ដោយឡែករ៉ែដែលមានច្បាប់និងគ្មានច្បាប់ទាំងអស់នៅខេត្តរតនគិរីនេះ ។
ឯកឧត្តមលី ធុជ ប្រធានក្រុមការងារថ្នាក់ជាតិចុះជួយខេត្តរតនគិរី បានមានប្រសាសន៏ថ្លែងក្នុងឪកាសនោះថា យើងមិនចង់អោយប្រជាពលរដ្ឋមើលឃើញក្រុមហ៊ុនជាសត្រូវ ហើយមានការភ័យខ្លាចនោះទេ គឺចង់អោយក្រុមហ៊ុនមានការអភិវឌ្ឍន៏ក្នុងប្រទេស ហើយប្រជាពលរដ្ឋនិងទទួលបានផលប្រយោជន៏ពីក្រុមហ៊ុនទាំងនោះនាថ្ងៃអនាគត ៕
ឡុង សារ៉េត
