ខេត្តរតនគីរី ៖ ប្រជាពលរដ្ឋ ឃុំញ៉ាង ក្នុងស្រុកអណ្ដូងមាស សុំអោយអាជ្ញាធរស្រុក ជួយសំរួលតម្លៃឆ្លងសាឡាង ដល់ការដឹកកសិផល ឆ្លងទន្លេសេសាន្ត ដែលមានតម្លៃខ្ពស់។
សាឡាងឯកជនឆ្លងទន្លេសេសាន្ត ស្ថិតក្នុងភូមិលូម ឃុំម៉ាលិក ស្រុកអណ្ដូងមាស ខេត្តរតនគីរី ម្ចាស់សាឡាងលោកស្រី សាន់ តា ដែលបានដំណើរការ ដឹកកសិផលឆ្លងទន្លេ ពីឃុំញ៉ាង ចូលស្រុកអណ្ដូងមាស តាំងពីស្ពានដែលសាងសង់ដោយក្រុមហ៊ុនឧកញ៉ាទ្រីភាព ត្រូវបាក់ទ្រុឌទ្រោម រហូតមកដល់ពេលនេះ ត្រូវបានប្រជាកសិករ ត្អូញត្អែថា អាជីវកម្មមិនបង់ថវិការចូលរដ្ឋ តែយកតម្លៃខ្ពស់ ហើយអាជ្ញាធរស្រុក មិនរវល់អើពើ។
តៃកុងបើកបររថយន្តកែច្នៃដឹកដំឡូងម្នាក់បានអោយដឹងថា តម្លៃឆ្លងរថយន្តទទេ និងឆ្លងដឹកដំឡូងមកវិញ គេយក១៥ម៉ឺនរៀល។ ដោយឡែកអ្នកស្រី សាន់តា ជាម្ចស់សាឡាង បានបញ្ជាក់ថា គាត់យកតែ១០ម៉ឺនរៀលទេ ទាំងឆ្លងរថយន្តទទេ ទៅនិងឆ្លងរថយន្តដឹកដំឡូងមក។
ជុំវិញការស្នើសុំ របស់ប្រជាពលរដ្ឋនេះ លោក នង ដារិទ្ធ អភិបាលស្រុកអណ្ដូងមាសបានបញ្ជាក់តាមទូរស័ព្វ នៅថ្ងៃទី០៦ ខែមករា ឆ្នាំ២០១៥ នេះថា សាឡាងដែលធ្វើអាជីវកម្ម ចម្លងរថយន្តដឹកកសិផលរាល់ថ្ងៃនេះ ពុំទាន់បានដាក់ដេញថ្លៃនៅឡើយទេ ដោយសារកាលពីមុន ប្រជាពលរដ្ឋដឹកកសិផល ឆ្លងតាមស្ពាន ។ តែពេលថ្មីៗ នេះស្ពានបាក់ទ្រុឌទ្រោម មិនអាចដឹកកសិផលឆ្លងស្ពានបាន ទើបប្រជាកសិករដឹកកសិផលឆ្លងតាម សាឡាងឯកជនមួយនេះ។ លោកបន្តទៀតថា លោកនិងធ្វើការសម្របសម្រួល ជាមួយម្ចាស់ សាឡាង អោយយកតាមតម្លៃសៀវភៅ បន្ទុកចាស់វិញ៕
ដោយឡុង សារ៉េត
