ខេត្តរតនគីរីៈ ឯកឧត្ដម លី ធុជ ទេសរដ្ឋមន្ត្រីទទួលបន្ទុកបេសកម្មពិសេស និងជាប្រធានក្រុមការងារ ថ្នាក់ជាតិ ចុះជួយខេត្តរតនគីរី បានអញ្ជើញចុះត្រួតពិនិត្យ ផ្លូវលំមួយខ្សែ ចូលភូមិ ត្រូវជនល្មោភដីម្នាក់ ធ្វើរបងបិទយកជាដីកម្មសិទ្ធ របស់ខ្លួន ជិតមួយឆ្មាំមកហើយ អាជ្ញាធរខេត្តដោះស្រាយមិនចេញ បញ្ជូនសំណុំរឿងទៅសាលាដំបូងខេត្ត ក៏នៅតែពុំឃើញមានដំណោះស្រាយដដែល ។
ដោយឆ្លងកាត់វេទិការសាធារណៈ នៅសាលមហោស្របខេត្តរតនគីរី នៅថ្ងៃទី១៩ ខែសីហា ឆ្នាំ២០១៤ ប្រជាពលរដ្ឋបានលើកឡើងអំពីក្តីកង្វល់ របស់ពួកគាត់ជុំវិញ រឿង ឈ្មួញម្នាក់ ទិញដី បិទផ្លូវ លំចូលភូមិរបស់ពួកគាត់។
ក្រោយពី ឯកឧត្ដម បានចុះពិនិត្យ ជុំវិញបញ្ហាទំនាស់នេះ ព្រមទាំងបានពិនិត្យមើលឯកសារ ប្លង់កាន់កាប់ដីមួយកន្លែងនេះរួចមក ឯកឧត្ដមក៏បានមានប្រសាសណែនាំ ដល់លោកអភិបាលក្រុងបានលុង អោយធ្វើការសម្របសម្រួល និងដោះស្រាយជូនប្រជាពលរដ្ឋ ព្រមទាំងអោយលោកអភិបាលក្រុងបានលុង ធ្វើរបាយការំ៍លទ្ធផល ជូនដល់ក្រុមការងារផងដែរ។
គួរបញ្ជាក់ផងដែរថា ផ្លូវលំចូលភូមិមួយខ្សែនេះ ជាផ្លូវចាស់តាំងពីយូណាស់មកហើយ ត្រូវឈ្មួញឈ្មោះ ហេង ប៊ុនធឿន ជាម្ចាស់ដីទើបទិញថ្មី ធ្វើរបងបិទយកផ្លូវធ្វើជាកម្ម សិទ្ធ តាំងពីថ្ងៃទី២៣ ខែសីហា ឆ្នាំ២០១៣ ហើយក៏មានដំណោះស្រាយសម្របសម្រួល ពីអាជ្ញាធរ ជាច្រើនលើកមកហើយដែរ។ ក៏ប៉ុន្តែការដោះស្រាយសម្របសម្រួល របស់អាជ្ញាធរ ហាក់បីដូចជាមិនមានការត្រូវរូវគ្នាសោះ រហូតដល់អាជ្ញាធរ បញ្ជូនសំណុំរឿងនេះទៅសាលាដំបូងខេត្ត នៅថ្ងៃទី២៥ ខែវិច្ឆិការ ឆ្នាំ២០១៣ ។ ហើយសាលាដំបូងខេត្តក៏បានសម្របសម្រួលចំនួន២លើក មកហើយ ក៏ប៉ុន្តែរឿងនេះនៅតែមិនត្រូវរូវគ្នាដដែល។ រហូតមកដល់ថ្ងៃទី១៩ ខែសីហា ឆ្នាំ២០១៤ នេះ ឯកឧត្ដម លី ធុជ បានអញ្ជើញជាអធិបតី ភាពនៅក្នុងកិច្ចប្រជុំវេទិកាសាធារណៈ នៅក្នុងសាលមហោស្របខេត្ត ហើយប្រជាពលរដ្ឋជាច្រើនបានលើកពីក្ដីកង្វល់របស់ពួកគាត់ជុំវិញបញ្ហាខាងលើ ទើបដំណឹងនេះបានដឹងដល់ ឯកឧត្ដម ក្រោយពីកិច្ចប្រជុំបានចប់ហើយនោះ នៅរសៀលថ្ងៃទី២០ ខែសីហា ឆ្នាំ២០១៤ ឯកឧត្ដមបានចុះទៅពិនិត្យដល់កន្លែងកើតហេតុតែម្ដង។
ក្នុងនោះដែរ ប្រជាពលរដ្ឋចំនួន ២៣គ្រួសារ ដែលជាប់គាំង ដោយសារការបិទផ្លូវ របស់ឈ្មួញខាងលើនេះ។ សុំសំណូមពរ អោយអាជ្ញាធរគ្រប់ជាន់ថ្នាក់ ក៏ដូចជាឯកឧត្ដមក្រុមការងារថ្នាក់ជាតិ មេត្តាជួយបើកផ្លូវលំមួយខ្សែនេះ ជូនដល់ពួកគាត់ ដើម្បីបានធ្វើដំណើរចេញចូលបានស្រួលផង៕
ឡុង សារ៉េត
