ខេត្តរតនគីរី ៖ ភាពចំរូងចំរាស់ រវាងអាជ្ញាធរក្រុងបានលុង និងក្រុមហ៊ុន វិនិយោគផ្សារក្រុងបានលុង កំពង់កើតមានឡើង យ៉ាងក្ដៅគគុក លើទីធ្លាដីសាធារណៈ ខាងមុខផ្សារ និង បរិវេនជុំវិញ ក្រៅផ្សារបានលុង។
អាជ្ញាធរក្រុងបានលុង បានចេញលិខិតមួយច្បាប់ កាលពីថ្ងៃទី៣០ ខែធ្នូ ឆ្នាំ២០១៤ ជូនដល់លោកឧកញ៉ា សា លាង ដែលជាម្ចាស់ ក្រុមហ៊ុន ហេង ដារា វិនិយោគផ្សារក្រុងបានលុង ដោយតម្រូវឲ្យ ក្រុមហ៊ុនរបស់លោកឧកញ៉ា បញ្ឈប់ការប្រមូលភាស៊ី គ្រប់ប្រភេទនៅបរិវេណជុំវិញក្រៅផ្សារបានលុង និងបញ្ឈប់ការ យកទីធ្លាដីទំនេរ ខាងមុខផ្សារបានលុង ដែលជាដីសាធារណៈរបស់រដ្ឋ ធ្វើជាកន្លែងផ្ញើរកង់ ម៉ូតូ និងរថយន្ត ចាប់តាំងពីថ្ងៃទី០៤ ខែមករា ឆ្នាំ២០១៥ ជាកំហិត បើមិនដូច្នោះទេ អាជ្ញាធរក្រុងបានលុង និងចាត់វិធានការតាមផ្លូវច្បាប់ជាធរមាន ហើយមិនទទួលខុសត្រូវ ចំពោះការខូចខាត ឬ បាត់បង់ទ្រព្យសម្បត្តិផ្សេងៗ របស់សហគ្រាស ហេង ដារា ដែលស្ថិតនៅលើទីតាំងដីនេះឡើយ។
លោក អ៊ុក សំអុល អភិបាលក្រុងបានលុង បានបញ្ជាក់ប្រាប់ក្រុមអ្នកយកព័ត៌មានយើងថា លោកនិងអនុវត្តវិធានការ តាមច្បាប់ ក្នុងខ្លឹមសារ នៃលិខិតដែលបានជូនដំណឹង កាលពីថ្ងៃ៣០ ខែធ្នូ ឆ្នាំ២០១៤ នោះ តែមិនបានកំណត់ថា ធ្វើនៅពេលណានោះទេ។
ក្រោយពីបានទទួលលិខិតជូនដំណឹងពីសាលាក្រុងបានលុង លោកឧកញ៉ា សា លាង ប្រធានក្រុមហ៊ុន ហេងដារា វិនិយោគផ្សារក្រុងបានលុង បានចេញលិខិតមួយច្បាប់ ច្រានចោលនូវខ្លឹម ក្នុងលិខិតរបស់អាជ្ញាធរក្រុង។ ដោយផ្អែកទៅលើ កិច្ចសន្យាសៀវភៅបន្ទុក ដែលទទួលស្គាល់ដោយ ក្រសួងសេដ្ឋកិច្ច ហិរញ្ញវត្ថុ ក្រសួងមហាផ្ទៃ និងចំណាឯកភាពរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។
លោកឧកញ៉ា សា លាង នាយកក្រុមហ៊ុន ហេងដារា វិនិយោគ ផ្សារក្រុងបានលុង បានបញ្ជាក់តាមទូរស័ព្វ នៅរសៀលថ្ងៃទី០៨ ខែមករា ឆ្នាំ២០១៥ នេះថា ចំពោះអាជ្ញាធរក្រុង ចាត់វិធានការយ៉ាងណាមកលើដែនសមត្ថកិច្ច របស់លោកនោះ ជារឿងរបស់គេទទួលខុសត្រូវចំពោះច្បាប់។ ដោយឡែក លោកឧកញ៉ាវិញ ក្រសួងសេដ្ឋកិច្ច ហិរញ្ញវត្ថុ ក្រសួងមហាផ្ទៃ និងរាជរដ្ឋាភិបាល អ្នកសម្រេច ដូច្នេះទាល់តែ អ្នកសម្រេច ធ្វើការសម្របសម្រួល ទើបលោកទទួលយកបាន។
គួរបញ្ជាក់ថា ទីធ្លាដីទំនេរសាធរណៈរបស់រដ្ឋ ដែលមានការចំរូងចំរាស់នោះមានផ្ទៃដី ៥៤ម៉ែត្រ គុណនិង ១០០ម៉ែត្រ បច្ចុប្បន្ន ក្រុមហ៊ុនវិនិយោគផ្សារធ្វើជាកន្លែង ផ្ញើម៉ូតូ និងចំណតរថយន្ត ៕
ឡុង សារ៉េត
