រតនគិរី ៖ ឯកឧត្តមខៀវ កាញារិទ្ធ រដ្ឋមន្ត្រីក្រសួងពត៌មាននាព្រឹកថ្ងៃទី១១ ខែកមរា ឆ្នាំ២០១៥ បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីសម្ពោធស្ថានីយ៍វិទ្យុផ្កាព្រៃFM101.75MHz ខេត្តរតនគិរី ។ ពិធីនេះមានការអញ្ជើញចូលរួមពីសំណាក់ឯកឧត្តមរដ្ឋលេខាធិការ ឯកឧត្តមក្រុមប្រឹក្សាខេត្ត ឯកឧត្តមអភិបាលខេត្តនិង ប្រធាន អនុប្រធាន អង្គភាពជុំវិញខេត្តយ៉ាច្រើនកុះករ ។
បន្ទាប់ពីការសម្តែងសិល្បៈរបស់ក្រុមសិល្បៈជនជាតិដើមភាគតិចក្រឹងរួចមក លោកស្រីលី ស៊ីផាញ់ នាយកការផ្សាយបានគោរពជូនឯកឧត្តមរដ្ឋមន្ត្រីក្រសួងពត៌មានថា ស្ថានីយ៍វិទ្យាផ្កាព្រៃចាប់ផ្តើមដំណើរការផ្សាយជាផ្លូវការនៅថ្ងៃទី០១ ខែកមរា ឆ្នាំ២០១៥ មានសពុលភាពផ្សាយ១គីឡូវ៉ាត់ បំពាក់អង់តែនផ្សាយកម្ពស់៩០ម៉ែត្រ វិសាលភាពផ្សាយគ្របដណ្តប់ទូទាំងខេត្ត និងបណ្តាខេត្តមួយចំនួនទៀតដូចជាខេត្តមណ្ឌលគិរី ក្រចេះ ស្ទឹងត្រែង និងខេត្តព្រះវិហា ផ្សាយក្នុង១៨ម៉ោងក្នុង១ថ្ងៃ ចាប់ពីម៉ោង៥ព្រឹក ដល់ម៉ោង២៣យប់ ។
លោកស្រីនាយិការបន្តថា ស្ថានីយ៍វិទ្យុផ្កាព្រៃមានទិសដៅច្បាស់លាស់ក្នុងផ្តល់នូវកម្មវិធីធំៗ ចំនួន៣ជូនសាធារណៈជនមានកម្មវិធីពត៌មាន អប់រំនិងកម្មវិធីកំសាន្ត ដោយផ្តោតសំខាន់សម្រាប់បងប្អូនជនជាតិដើមភាគតិច ចារ៉ាយ ទំពួន ឡាវ និងក្រឹង ។ ស្ថានីយ៍ផ្កាព្រៃមានផ្សាយសម្រាប់បងប្អូនជនជាតិដើមភាគតិចរយៈពេល៤ម៉ោង។
មានប្រសាសន៍សំណេះសំណាលនាឱកាសនេះឯកឧត្តមថង សាវុន អភិបាលនៃគណៈអភិបាលខេត្ត និងឯកឧត្តមខៀវ កាញារិទ្ធ រដ្ឋមន្ត្រីក្រសួងពត៌មានបានថ្លែងកោតសសើរចំពោះការកោតសសើរចំពោះការរីកចំរើនលើវិស័យពត៌មានក្នុងខេត្តគួអោយគត់សំគាល់ បើប្រៀបធៀបប៉ុន្មានឆ្នាំមុននេះ ប្រជាពលរដ្ឋក្នុងខេត្ត ទទួលបានពត៌មានមិនទូលំទូលាយនេះទេ បច្ចុប្បន្នក្រោមការដឹកនាំរបស់រាជរដ្ឋាភិបាលដែលមានសម្តេចតេជោហ៊ុន សែន ជាប្រមុខ វិស័យពត៌មានបានឈានដល់កំរិតនៃបច្ចេកវិជ្ជាទំនើបហើយ ពោលគឺប្រជាពលរដ្ឋនៅទូទាំងប្រទេសអាចស្តាប់ អាន មើល នូវពត៌មានគ្រប់បែបយ៉ាងតាមរយៈវិទ្យុទូរស្សន៍ អ៊ីធើណេត និងបណ្តាញពត៌មានសង្គម(Facebook)ជាដើម ។
ឯកឧត្តមអភិបាលខេត្ត និងឯកឧត្តមរដ្ឋមន្ត្រីសំណូមពរដល់ម្ចាស់ស្ថានីយ៍វិទ្យុឯកជនក្នុងខេត្តទាំងអស់មិនត្រូវគិតពីពាណិជ្ជកម្មពេកនោះទេ ពោលគឺត្រូវផលិតកម្មវិធីឲ្យបានច្រើន ជាពិសេសពិធីករ ពិធីការនី ត្រូវប្រកាន់ភ្ជាប់នូវជំនាញវិជ្ជាជីវៈ ត្រូវនិយាយដែលពិតត្រឹមត្រូវច្បាស់លាស់បំរើដល់អ្នកស្តាប់របស់ខ្លួន ។ តមកឯកឧត្តមខៀវ កាញារិទ្ធ និងគណៈប្រតិភូបានអញ្ជើញកាត់ខ្សែបូសម្ពោធដាក់អោយដំណើរការផ្សាយវិទ្យុផ្កាព្រៃកំរិតFM101.75MHzចាបីពេលនេះតទៅ ៕
ឡុង សារ៉េត
