ខេត្តរតនគីរី ៖ ក្រុមឈ្មួញកំពង់ដាក់ម៉ាស៊ីនត្រង់ស៊ីណ័រជាច្រើនគ្រឿង កាប់បំផ្លាញពុះជ្រៀកឈើព្រៃសហគមន៍ ធ្វើជាជន្លុងម្រេច និងកាប់រំលំដើមឈើយកដី ធ្វើជាកម្មសិទ្ធផ្ទាល់ខ្លួន។
ដីព្រៃសហគមន៍ភូមិចាអ៊ុងកូវ ឃុំចាអ៊ុង ស្រុកអូរជុំ ខេត្តរតនគីរី កំពង់រងនូវការកាប់បំផ្លាញយ៉ាងរំគៀល ពីសំណាក់ក្រុមឈ្មួញ នូវដើមផ្ចឹក ដើមរាំង សុក្រំ មិនថាតូច មិនថាធំ អោយតែគេអាចពុះជ្រៀក ធ្វើជាជន្លុងម្រេចបាន ដឹកយកទៅលក់ មិនត្រឹមតែប៉ុណ្ណោះ ប្រជាពលរដ្ឋ នៅភូមិកាចាញ សង្កាត់កាចាញ មកកាប់ដុតបំផ្លាញយកដីធ្វើជាកម្មសិទ្ធិផ្ទាល់ខ្លួន បន្ថែមទៀត ដោយពុំមានការទប់ស្កាត់ ពីសហគមន៍ និងជំនាញរដ្ឋបាលព្រៃឈើឡើយ។
ប្រជាពលរដ្ឋនៅភូមិចាអ៊ុងកូវ បានអោយដឹងថា មេឈ្មួញដែលដាក់ម៉ាស៊ីនត្រង់ស៊ីណ័រពុះជ្រៀកឈើធ្វើជន្លុងម្រេចដឹកយកទៅលក់ជារៀងរាល់ថ្ងៃនោះ មានឈ្មោះ រដ្ឋា ត្រូវជាកូនប្រសាលោក សាក់ សុន ប្រធានក្រុមប្រឹក្សាស្រុកអូរជុំ មានលំនៅក្នុង ក្រុងបានលុង ហើយមិនដែលឃើញ សហគមន៍ភូមិគ្រប់គ្រងព្រៃឈើ ឬជំនាញរដ្ឋបាលព្រៃឈើបង្ក្រាបម្ដងណាទេ។
លោក ត្រេន ឡំ អនុប្រធានសហគមន៍ព្រៃឈើភូមិចាអ៊ុងកូវ និងជាប្រធានសហគមន៍ទឹកធ្លាក់ចាអ៊ុង បានអោយដឹងនៅរសៀលថ្ងៃទី៤ ខែមិនា ឆ្នាំ២០១៥ថា បញ្ហាគេកាប់ឈើក្នុងព្រៃសគមន៍លោកពុំបានដឹងទេ ពីព្រោះលោកជាអនុប្រធាន ការងារនេះសួរទៅលោក អាង ចន្ថាទៅគេជាប្រធានសហគមន៍។
ចំណែកលោក អាង ចន្ថា វិញបានប្រាប់អ្នកសាព័ត៌មានយើងតាមទូរស័ព្វនៅរសៀលថ្ងៃនេះដែរថា លោកមិនដឹងទេ ពីព្រោះលោកមិនមែនជាប្រធានសហគមន៍ទេ គាត់នៅក្រុមប្រឹក្សាឃុំ។
លោក ពាល់ អយ មេឃុំចាអ៊ុង បានបញ្ជាក់តាមទូរស័ព្វនៅល្ងាចថ្ងៃនេះដែរថា លោក អាង ចន្ថា ជាប្រធានសហគមន៍គ្រប់គ្រងព្រៃឈើ បញ្ហាគេដឹកជន្លុងម្រេចគាត់បានឃើញរថយន្តកែច្នៃដឹកជញ្ជូនជារៀងរាល់ថ្ងៃ តែគាត់ពុំបានដឹងថាជារបស់អ្នកណានោះទេ ។
លោក មូល សំវាំង នាយរដ្ឋបាលព្រៃឈើទទួលបន្ទុក៣ស្រុក គឺស្រុកអូរជុំ វើនសៃ តាវែង បានបញ្ជាក់អោយដឹងតាមទូរស័ព្វនៅល្ងាចថ្ងៃនេះដែរថា ព្រៃសហគមន៍ដែលជំនាញរដ្ឋបាលព្រៃបានប្រគល់អោយសហគមន៍ គឺប្រធានសហគមន៍ជាអ្នកគ្រប់គ្រង ហើយមានសិទ្ធចាត់ចែង អោយប្រជាពលរដ្ឋក្នុងសហគមន៍កាប់ប្រើប្រាស់ ជាលក្ខណៈគ្រួសារបាន តែមិនអនុញ្ញាតិអោយធ្វើអាជីវកម្មឡើយ។ករណីកាប់បំផ្លាញខាងលើ ជាលក្ខណៈ អាជីវកម្ម និងកាប់ដុតបំផ្លាញព្រៃស្រោងយកដីធ្វើជាកម្មសិទ្ធ ពិតជាខុសច្បាប់ទាំងស្រុងហើយ។ ហើយបញ្ហានេះលោកពុំបានដឹងទេ ពីព្រោះប្រធានសហគមន៍ ឬអាជ្ញាធរមូលដ្ឋាន ក៏មិនបានរាយការណ៍ជូនលោកដែរ។ លោកបន្តទៀតថា លោកនិងដឹកនាំកម្លាំងចុះត្រួតពិនិត្យក្នុងពេលឆាប់ៗនេះហើយ។
ក៏ប៉ុន្តែនៅល្ងាចថ្ងៃទី៤ ខែមិនា នេះគេបានឃើញរថយន្តកែច្នៃជាច្រើនគ្រឿងដឹកជន្លុងម្រេច ហើយគេបានរាយការណ៍ជូនលោក មូល សំវាំង នាយរដ្ឋបាលផ្នែកស្រុកអូរជុំ លោកបានត្រឹមថា អោយ ជំនាញរដ្ឋបាលព្រៃឈើសង្កាត់ចុះទៅហើយ។ ដោយឡែកគេបានឃើញរថយន្តដឹកជន្លុងម្រេចនោះ ធ្វើចរាចរណ៍យ៉ាងរលូន ពុំកោតញញើតសមត្ថកិច្ច ដោយឆ្លងកាត់ពីមុខស្នាក់ការផ្នែកលំផាត់ និងសង្កាត់ក្រុងបានលុងយ៉ាងរំភើយ។
គួររំលឹកថា ការធ្វើអាជីវកម្មចែកចាយជន្លុងម្រេចខាងលើនេះ ត្រូវបានប្រជាពលរដ្ឋរិះគន់ថា បើគ្មានការបើកដៃពីមន្ត្រីជំនាញពាក់ព័នទេនោះ គ្មានអ្នកណាម្នាក់អាចធ្វើសកម្មភាពបានដោយរលូននោះឡើយ៕
ដោយ ឡុង សារ៉េត