ខេត្តរតនគិរីៈ ក្រុមហ៊ុនពេជ្រឫទ្ធសីCo.Ltd ដែលមានទីតាំងនៅក្នុងក្រុងបានលុងខេត្តរតនគិរីកំពុងធ្វើឲ្យសម្បត្តិដូនតារបស់បងប្អូនជនជាតិដើមភាគតិចរលាយហិនហោចជាបណ្តើរៗហើយ តាមរយៈការធ្វើជំនួញព្រៃឈើដ៏សែនមហាសោកស្តាយនោះ។
ក្រុមហ៊ុនពេជ្រឫទ្ធសីCo.Ltd ដែលមានលោកឧកញ៉ា សី ជានាយកក្រុមហ៊ុននោះ សព្វថ្ងៃនេះបាននិងកំពុងធ្វើភាពសុខសាន្តរបស់បងប្អូនជនជាតិដើមភាគតិចនៅភាគឦសាននៃប្រទេសនេះកើតក្តីក្តៅក្រហាយដោយបានត្រឹមតែឈរមើលទាំងហូរទឹកភ្នែកតែប៉ុណ្ណោះ អំពីសកម្មភាពធ្វើវិនាសកម្មព្រៃឈើយ៉ាងខ្លាំងក្លារបស់ក្រុមហ៊ុនមួយនេះ។
ក្រុមហ៊ុនពេជ្រឫទ្ធសី ថ្មីៗនេះត្រូវប្រជាពលរដ្ឋនៅតំបន់ដាក់ស្រយាលក្នុងស្រុកលំផាត់បានរាយការណ៍ថា ព្រៃឈើដ៏មានតម្លៃនិងមិនអាចកាត់ថ្លៃបាន ដែលជាសម្បត្តិដូនតា ឫសម្បត្តិជាតិ និងប្រជាជនកម្ពុជាទាំងមូលនោះកំពុងរងនូវការកាប់បំផ្លាញយ៉ាងគំហុគបំផុតនាទស្សវត្សទី២១នេះ។
សោកនាដកម្មព្រៃឈើរបស់ក្រុមហ៊ុនពេជ្រឫទ្ធសី គឺមិនមានស្ថាប័នពាក់ព័ន្ធ ឫស្ថាប័នឯករាជ្យនៃប្រទេសនេះចាត់វិធានការក្តៅឫតាមចាប់ខ្លួនអ្នកដែលពាក់ព័ន្ធ ដែលនាំឲ្យមានបទឧក្រិដ្ឋព្រៃឈើនៅតំបន់នោះឡើយ។
ប្រជាពលរដ្ឋបានធ្វើសេចក្តីរាយការណ៍ថា ព្រៃឈើកំពុងរងការកាប់បំផ្លាញ់នោះគឺស្ថិតនៅចំណុចឫតំបន់ដែនជម្រកសត្វព្រៃលំផាត់ ដែលព្រៃទាំងនោះស្ថិតនៅក្រោមការឃ្លាំមើលនិងគ្រប់គ្រងដោយក្រុមមន្ត្រីបរិស្ថានក្នុងខេត្តរតនគិរី។ ប៉ុន្តែគេធ្ងល់ថា ហេតុអ្វីខ្លះទៅបានជាក្រុមមន្ត្រីបរិស្ថានប្រចាំការនៅតំបន់នោះមិនត្រូវគេស៊ើបអង្កេតឲ្យហ្មត់ចត់នៅឯកសារ ឫរបាយការណ៍អំពីមូលហេតុចំបងដែលនាំឲ្យមានបទឧក្រិដ្ឋព្រៃឈើនៅតំបន់នោះ។
លោក អ៊ូ សុធី នាយកគ្រប់គ្រងបរិស្ថាន និងដែនជម្រកសត្វព្រៃលំផាត់ នៅពេលសួរអំពីសេចក្តីរាយការណ៍របស់ប្រជាពលរដ្ឋ ស្តីពីក្រុមហ៊ុនពេជ្រឫទ្ធសី ថាបានលួចកាប់ព្រៃចេញពីក្នុងតំបន់ការពារដែនជម្រកសត្វព្រៃ លោកបានថ្លែងថា “លោកឧកញ៉ា សី គឺមានក្រុមហ៊ុនមួយនៅប្រមូលផល អនុផលព្រៃឈើនៅក្នុងតំបន់របស់ខ្ញុំ មិនមែនមានតែក្រុមហ៊ុនឧកញ៉ាសី តែមួយនោះទេ គឺមានដល់ទៅ៦ក្រុមហ៊ុនឯណោះ គឺមានបង់ពន្ធត្រឹមត្រូវ មានអន្តរក្រសួង មានក្រុមការងារចុះមកវាស់វែងដើម្បីបង់ពន្ធ”។ លោកបានថ្លែងថា “ក្រុមហ៊ុនប្រមូលផល អនុផលព្រៃឈើទាំងអស់ វាស្ថិតនៅក្នុងដែនការពារ និងនៅក្នុងដីសម្បទានសេដ្ឋកិច្ច ដូច្នេះលោកមិនមែនភ្នែក១០០ ដៃ១០០០នោះទេ ខ្ញុំមើលមិនអស់ឡើយ”។
លោកបានថ្លែងទាំងមានមោទនភាពថា “មានវិទ្យអាស៊ីសេរី កាសែតCambodia daily កាសែតភ្នំពេញpost និងពត៌មានមួយចំនួនទៀតបានធ្វើការចុះផ្សាយអំពីខ្ញុំ មិនមែនទើបតែកាសែតយុត្តិធម៌ប៉ុណ្ណោះទេ ដែលផ្សាយពីគាត់នោះ ប៉ុន្តែការផ្សាយនោះខ្ញុំមិនបានខ្វាយខ្វល់ឡើយ” ។
ដោយឡែកលោកឧកញ៉ា សី ដែលជានាយកក្រុមហ៊ុនពេជ្រឫទ្ធសីCo.Ltd ជាទូទៅ “កាសែតយុត្តិធម៌មិនអាចស្វែងរកការបំភ្លឺ ជុំវិញការចោទប្រកាន់អំពីការធ្វើជំនួញក្នុងបទឧក្រិដ្ឋព្រៃឈើនោះឡើយ” ។
គេនឹងរងចាំមើលថាតើរាជរដ្ឋាភិបាលកម្ពុជាដឹងមានចំណាត់ការយ៉ាងដូចម្តេចចំពោះក្រុមហ៊ុនមួយចំនួនដែលតែកំពុងធ្វើជំនួញព្រៃឈើដោយខុសច្បាប់នោះ៕
ឡុង សារ៉េត