ខេត្តរតនគិរីៈ ៖ សមត្ថកិច្ចចម្រុះខេត្តបានចុះបង្ក្រាបទីតាំងស្តុកឈើប្រណិតរបស់ជនជាតិវៀតណាម ទីកន្លែងម្ចាស់ជំនួញឈើប្រណិតវៀតណាមទាំងពីរនាក់នោះ ឈ្មោះ ទៀង (ឡេ វ៉ាន់ថាន់) ទី២ឈ្មោះ អាញីដែលជាអ្នកជំនួញភាគហ៊ុនជាមួយគ្នាក្នុងនោះជាក់ស្តែងមន្ត្រីនគរបាលស្នងការដ្ឋានខេត្តរតនគិរីពាក់ស័ក្តិ៤កន្លះដ៏មានអំណាចនៅក្នុងខេត្តឈ្មោះ ស៊ី វែង បានឃុបឃិតជួលផ្ទះអោយជនជាតិវៀតណាមទាំងពីរនាក់នេះផ្ទុកឈើប្រណិតរាប់ពាន់កំណាត់រៀបដាក់ចូលរថយន្តក្រុងវៀតណាមដើម្បីដឹកជញ្ជូនឆ្លងកាត់តាមផ្លូវច្រកទ្វារព្រំដែនស្រុកអូរយ៉ាដាវរតនគិរីឆ្លងទៅប្រទេសវៀតណាម។
ហេតុការណ៍ចុះបង្ក្រាបឈើប្រណិតនេះគឺបានធ្វើឡើងនៅក្នុងក្រុងបានលុង ខេត្តរតនគិរីកាលពីព្រឹកថ្ងៃទី១៨ ខែឧសភា ឆ្នាំ២០១៥ ដែលដឹកនាំដោយព្រះរាជអាជ្ញារងនៃសាលាដំបូងខេត្ត លោកជា សុភ័ក្ត្រ និងក្រុមសមត្ថកិច្ចចម្រុះមាន នគរបាលប្រឆាំងបទល្មើសសេដ្ឋកិច្ចខេត្ត រដ្ឋបាលព្រៃឈើខេត្ត និងក្រុមមន្ត្រីបរិស្ថាន។
ទីតាំងស្តុកឈើប្រណិតដែលត្រូវបានបង្ក្រាបនោះមាន២កន្លែង គឺទី១ស្ថិតនៅក្នុងសង្កាត់បឹងកន្សែង និងទី២ស្ថិតនៅក្នុងភូមិជ្រី សង្កាតយក្ខឡោម ក្រុងបានលុង ខេត្តរតនគិរី។
មន្ត្រីដែលបានចុះបង្ក្រាបនោះភ្លាមៗបានប៉ាន់ប្រមាណថា ឈើប្រណិតទាំងពីរកន្លែងនេះមានចំនួនប្រមាណ២០ម៉ែត្រត្រីគុណ ហើយឈើទាំងនេះជាឈើប្រណិតប្រភេទធ្នង់។ ក្រុមមន្ត្រីបានបង្ហើបឲ្យដឹងថាឈើប្រណិតទាំងនេះទំនងត្រូវគេបាននិងកំពុងធ្វើជំនួញទៅកាន់ប្រទេសវៀតណាម ដែលតាមមធ្យោបាយគឺដឹកតាមរថយន្តក្រុងដឹកអ្នកដំណើរ របស់វៀតណាម។ រយៈពេលពេញមួយថ្ងៃនៃថ្ងៃទី១៨ នេះឈើទាំងនោះកំពុងត្រូវបានសមត្ថកិច្ចដឹកទៅកាន់ការិយាល័យ ប៉ុន្តែគេនៅមិនទាន់ដឹងថា វាមានចំនួនប៉ុន្មានម៉ែត្រត្រីគុណនោះទេ។ ហើយការចុះបង្ក្រាបឈើប្រណិតខាងលើនេះផងដែរ គឺបានធ្វើឲ្យប្រជាពលរដ្ឋមានការភ្ញាក់ផ្អើល គ្រាដែលប្រមុខរដ្ឋាភិបាល និងក្រុមមន្ត្រីថ្នាក់ជាតិតែងតែព្រមានថ្នាក់ក្រោមជាតិឲ្យរឹតបន្តឹងឲ្យខាងតែបានជុំវិញករណីរត់ពន្ធឈើប្រណិតទាំងនេះ៕
ឡុង សារ៉េត
