ខេត្តត្បូងឃ្មុំ ៖ តាមប្រភពពីប្រជាជនឱ្យដឹងថា តាំងពីលោកព្រាបធារ៉ាត(ហៅសិត)ឡើងកាន់តំណែងជាមេគយចល័តប្រចាំនៅខេត្តត្បូងឃ្មុំ មក គេឃើញថា ឈ្មួញរកស៊ីតូចធំបានខឹងសម្បារយ៉ាងខ្លាំង និងលោកព្រាបធារ៉ាត(ហៅសិត)ព្រោះគាបសង្កត់បង្ខិតបង្ខំឱ្យឈ្មួញទាំងអស់នោះបង់លុយ ដោយគ្មានការយោគយល់ឡើយ។ ប៉ុន្តែសម្រាប់ក្រុមឈ្មួញធំៗ ដែលរកស៊ីនាំចូល ទំនិញគេចពន្ធ និងអ្នករកស៊ី ដឹកជញ្ជូនឈើខុសច្បាប់ ចេញទៅប្រទេសវៀតណាម ទទួលបានការយោគយល់ពីលោកព្រាបធារ៉ាត(ហៅសិត) ព្រោះការដឹកជញ្ជូន បទល្មើសទាំងនោះ គឺជាប្រភពចំណូលមិនចេះរីងស្ងួតសំរាប់លោកព្រាបធារ៉ាត( ហៅសិត)ដាក់ចូលហោប៉ៅផ្ទាល់ខ្លួន។
ប្រជាពលរដ្ឋបន្តឱ្យដឹងថា សព្វថ្ងៃលោកព្រាបធារ៉ាត(ហៅសិត)ប្រព្រឹត្តអំពើពុករលួយយ៉ាងសង្ហាចំហរចាស់ដៃ ព្រោះមានទំនិញគេចពន្ធ ជាច្រើនប្រភេទសន្ធឹកសន្ធាប់ ដែលឈ្មួញធំៗនាំឆ្លងកាត់ គឺជំនាញគយ របស់លោកព្រាបធារ៉ាត(ហៅសិត)បានឃុបឃិតជាមួយឈ្មួញ បង់ពន្ធរបៀបជាប្រភេទទំនិញក្លែងភេទ និងបង់ពន្ធមិនគ្រប់ជាដើម។ ពេលខ្លះឈ្មួញ ដឹកសុទ្ធតែថ្នាំពេទ្យពេញទំហឹង គ្រឿងសំណង់យ៉ាងក្រាស់ក្រែល និងទំនិញមានតម្លៃយ៉ាងសម្បើម តែគេបង់ពន្ធ ជារបៀបទំនិញចាប់ហួយ ឬតុ កៅអី ជ័រ ទៅវិញ ហើយការបង់ពន្ធ ក្លែងភេទទំនិញនេះ ក៏គេមិនបង់ទាំងស្រុង មិនគ្រប់ចំនួននោះដែរ យ៉ាងច្រើនគេបង់ ត្រឹមតែ ៤០ទៅ៥០ ភាគរយប៉ុណ្ណោះ ដែលធ្វើឱ្យបាត់បង់ចំណូលថវិការដ្ឋរាប់សិបលានដុល្លារ ក្នុងមួយខែៗ។
សំរាប់ប្រជាពលរដ្ឋ ដែលដឹកផលកសិកម្ម ទៅលក់នៅប្រទេសវៀតណាម បានឱ្យដឹងថា ពួកគាត់ដឹកដំឡូងមី ពោត គ្រាប់ស្វាយចន្ទី សណ្តែកដី បានប្រាក់ចំណេញ តិចតួចស្តួចស្តើងប៉ុណ្ណោះ ត្រូវកូនចៅរបស់លោកព្រាបធារ៉ាត(ហៅសិត)គាបសង្កត់យកលុយ ហើយប្រឈមនឹងការស្តីបន្ទោស មើលងាយមើលថោក ដោយសម្តីអសុរោះយ៉ាងខ្លាំងទៀតផង។ ប៉ុន្តែសម្រាប់ក្រុមឈ្មួញ រកស៊ីដឹកឈើខុសច្បាប់ ឆ្លងដែនទៅវៀតណាម ដូចជាឈ្មោះ សាន ចយ ឧកញ៉ា លឹម ប៊ុណ្ណា ហៅខ្នា ជាដើម ។
គេមិនដែលឃើញ លោកព្រាបធារ៉ាត(ហៅសិត)បញ្ចោញឫកពាឬប្រើសម្តីធំៗ ទៅលើក្រុមឈ្មួញទាំងនោះ ហើយឃុបឃិតគ្នា ជាមួយអ្នករកស៊ីល្មើសច្បាប់ ដើម្បីបានលុយច្រកហោប៉ៅ ដោយមិនខ្វល់ពី ការកែទម្រង់របស់លោក គុណ ញឹម ដែលជាមេគយនោះទេ។
ទំនិញគេចពន្ធទាំងនេះ មិនអាចគេចផុត ពីក្រសែភ្នែកសមត្ថកិច្ចគយ បានទេ តែលោកព្រាបធារ៉ាត(ហៅសិត)បានចាត់ទុកជាឆ្នាំងបាយ ជាប្រយោជន៍ សម្រាប់បំពេញសេចក្តីត្រូវការរបស់ខ្លួនផង និងថ្នាក់លើផង សម្រាប់ការពារតួនាទីតំណែងខ្លួនតែប៉ុណ្ណោះ ។
សារពត៌មានយើងមិនអាចទំនាក់ទំនងលោកព្រាបធារ៉ាត(ហៅសិត)បានទេពេលខ្លះទូរស័ព្ទចូលហើយត្រូវចុចបិតវិញភ្លាមតែម្តង ៕
