ភ្នំពេញ ៖ ខែសីហា កន្លងមកនេះ មានករណីបណ្តឹងមួយ ដោយអ្នកស្រី យូ ចន្ថា បានស្នើសុំអន្តរាគមន៍ពីសម្តេចអគ្គ មហា សេនាបតីតេជោ ហ៊ុន សែន នាយករដ្ឋមន្ត្រីនៃ ព្រះរាជាណាចក្រកម្ពុជា ។ ក្នុងកម្មវត្ថុ នៃពាក្យស្នើសុំ អន្តរាគមន៍នោះ បានសរសេរថា «សំណើសុំសម្តេច មេត្តាជួយរក យុត្តិធម៌ដល់នាងខ្ញុំ ដែលត្រូវបានលោក ឧត្តមសេនីយ៍ទោ ប៉ុល រតនា រងនាយកដ្ឋានរងព្រហ្មទណ្ឌ ក្រសួងមហាផ្ទៃនៃព្រះរាជាណាចក្រកម្ពុជា បានឃុបឃិតគ្នា ជាមួយ និងលោក សៀង សុខ ព្រះរាជអាជ្ញារង សាលាដំបូង រាជធានីភ្នំពេញ ចាប់ឃុំឃាំងចំនួន ៣យប់ ៤ថ្ងៃ ក្នុងបន្ទប់របស់លោក… ហើយគំរាមកំហែងបង្ខំនាងខ្ញុំ ឱ្យផ្តិតមេដៃ ប្រគល់ដីចំនួន ១៨ហិកតា ៣០អា ទៅឱ្យឈ្មោះ សេង ស៊ីហេង និងឈ្មោះ ឡាំ ឆាយគីម ជាតំណាងសមាគម ចិនហុកគៀន ដែលមានទីតាំងស្ថិតនៅ ភូមិព្រៃដូនអុក សង្កាត់ត្រពាំងក្រសាំង ខណ្ឌពោធិសែនជ័យ រាជធានីភ្នំពេញ» ។
ពាក់ព័ន្ធនឹងពាក្យស្នើសុំ អន្តរាគមន៍ខាងលើនេះ ឯកឧត្តម ហូ សិទ្ធី នាយកខុទ្ទកាល័យ សម្តេចអគ្គមហា សេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានធ្វើដីកាបញ្ជូនចំនួន ០២ ក្នុងខែសីហា គឺដីកាបញ្ជូនទី១ លេខៈ ៩១០ ខន/០១៥ ចុះថ្ងៃទី ០៥ ខែសីហា ឆ្នាំ២០១៥ គោរពជូនទៅ ឯកឧត្តម អ៊ឹម ឈុនលឹម ទេសរដ្ឋមន្ត្រី រដ្ឋមន្ត្រី ក្រសួងរៀបចំដែនដី នគរូបនីយកម្ម និងសំណង់ និងដីកាបញ្ជូនទី២ លេខៈ ៩៧៤ ខន/០១៥ ចុះថ្ងៃទី ២៤ ខែសីហា ឆ្នាំ២០១៥ គោរពជូនទៅ ឯកឧត្តម អង្គ វង្សវឌ្ឈនា រដ្ឋមន្ត្រី ក្រសួងយុត្តិធម៌។
មជ្ឈដ្ឋានមួយចំនួន ដែលបានដឹង ព័ត៌មានពាក់ព័ន្ធខ្លះៗ ក៏បានអំពាវនាវដែរថា បើចង់ដឹងថា តើនរណាខុស ឬនរណាត្រូវ ? អ្នកណារងគ្រោះ ដ៏អយុត្តិធម៌ និងអ្នកណា ជាអ្នកឃុបឃិតគ្នា ប្រព្រិត្តអំពើអយុត្តិធម៌យ៉ង់ឃ្នង ធ្ងន់ធ្ងរនោះ គឺសូមឱ្យ ឯកឧត្តម ឱម យ៉ិនទៀង ប្រធានអង្គភាព ប្រឆាំងអំពើពុករលួយ មេត្តាជួយចាត់ការ ស្រាវជ្រាវ ស៊ើបអង្កេត ករណីនេះជាបន្ទាន់ ដោយមិនលម្អៀង ប្រាកដជាអាច នឹងបានដឹងរឿងច្បាស់ជាមិនខាន… (ដូចករណីឈានទៅចាប់ខ្លួន មន្ត្រីប៉ូលិសមួយចំនួន និងករណីចាប់ខ្លួនលោក អាំង មារតី យកទៅដាក់ពន្ធនាគារ) ជាមិនខានឡើយ… ។
សូមបញ្ជាក់ថា បន្ទាប់ពីទទួលបាន ឯកសារមួយកំភ្លូស ពាក់ព័ន្ធនឹងព័ត៌មាននេះ អង្គភាពគេហទំព័រយើង បានព្យាយាមទាក់ទង សុំការសម្ភាសន៍បំភ្លឺ ពីឧត្តមសេនីយ៍ទោ ប៉ុល រតនា និងពីលោក សៀង សុខ ព្រមទាំងឈ្មោះ សេង ស៊ីហេង, ឡាំ ឆាយគីម ជាតំណាងសមាគម ចិនហុកគៀនដែរ… តែមិនអាចទាក់ទង បាននៅឡើយទេ ហើយពេលខ្លះចូល តែត្រូវបានបិទទៅវិញ ៕
