វិធីរកលុយកើបលុយមានជាហូរហែឥតដាច់ឱ្យតែហ៊ាន ឱ្យតែមានខ្នងបង្អែករឹងមាំឱ្យតែមានឱកាស គឺចាត់ការតែម្តង មិនបង្អង់ គឺស៊ីទាំងលើស៊ីទាំងក្រោម ឱ្យតែត្រូវគ្នាសង់តង់គ្នាទៅវិញទៅមក បានលុយស្រេចដូចពាក្យថា ទន្សោងគោព្រៃ ផឹកទឹកដងអូរ តូចស៊ីតាមតូច ធំស៊ីតាមធំ ។
តាមប្រភពព័ត៌មានពីប្រជាពលរដ្ឋរស់នៅក្នុងក្រុងប៉ោយប៉ែត ខេត្តបន្ទាយមានជ័យ បានឱ្យខាងសារព័ត៌មានយុត្តិធម៌ យើងដឹងថា មេនគរបាលអន្តោប្រវេសន៍ដែលមានលោកឧត្តមសេនីយ៍ត្រី ស៊ឹម សំអាត ជាប្រធានប្រចាំច្រកអន្តរជាតិប៉ោយប៉ែត ខេត្តបន្ទាយមានជ័យ សព្វថ្ងៃនេះកំពុងដាក់បញ្ជាពង្រាយកូនចៅឱ្យធ្វើសកម្មភាពយ៉ាងសកម្មគគ្រឹកគគ្រេងដាក់កុងត្រូល យ៉ាងរឹងមាំដើម្បីប្រើអំណាចគំរាមទារលុយពីប្រជាពលរដ្ឋធ្វើប័ណ្ណឆ្លងកាត់ព្រំដែនយ៉ាងផុសផុលកាក់កបបំផុត ហើយមិន តែប៉ុណ្ណោះ បានបើកដៃឱ្យប្រជាពលរដ្ឋដាក់លក់ដូរចង្អៀតផ្លូវធ្វើដំណើររបស់ប្រជាពលរដ្ឋ និងទេសចរណ៍យ៉ាងអនាធិបតេយ្យ ពាសពេញលើចិញ្ចើមផ្លូវដងផ្លូវ ដើម្បីម្យ៉ាងគត់គឺទារយកលុយប្រចាំខែដាក់ចូលហោប៉ៅរបស់ខ្លួន និងបក្ខពួកខ្លួន (កូនចៅ)ដើម្បីសម្រាប់ស៊ីផឹកស៊ីញីអូនបង និងដាក់ជាកញ្ចប់ ឬកាដូជូនមកថ្នាក់លើរបស់ខ្លួន ដើម្បីការពារទប់តំណែងកៅអី នេះឱ្យនៅនឹងស្រួល ដើម្បីមេផង ដើម្បីខ្លួនផង និងដើម្បីកូនចៅផង ។ និយាយឱ្យចំ គឺដើម្បីទាំងអស់គ្នា តែចំពោះប្រជាពលរដ្ឋ ឈឺចាប់ស្រក់ទឹកភ្នែក គេមិនខ្វល់គឺចាំអង្គុយបើកភ្នែកឆ្វេងស្តាំប្រើសម្តីគំរាមកំហែងទារលុយ កើបលុយយ៉ាងច្រើនសន្ធឹកសន្ធាប់ដាក់ហោប៉ៅតាមរបៀបគេហៅថា ត្រីងៀតឆ្លៀតពង ឬទាន់មានឱកាស ។
តាមប្រភពព័ត៌មានដដែលបានឱ្យដឹងថា លោកឧត្តមសេនីយ៍ត្រី ស៊ឹម សំអាត ជាប្រធានអន្តោប្រវេសន៍ប្រចាំច្រកអន្តរជាតិប៉ោយប៉ែត មានសម្អាងខ្នងបង្អែកយ៉ាងរឹងមាំដោយខាងលុយផង ដោយខាងអគ្គនាយកដ្ឋានអន្តោប្រវេសន៍ក្រសួងមហាផ្ទៃផង ហេតុដូច្នេះទើបលោក ស៊ឹម សំអាត មិនឈឺក្បាលវិលមុខមិនខ្វល់ មិនសូវគោរពច្បាប់ មិនក្រែងរអែងពីការផ្សាយព័ត៌មាននានាឡើយ គឺធ្វើយ៉ាងណាប្រើអំណាចទាន់ខ្លួនមាន ដើម្បីចាត់វិធានការដាក់ផែនការឱ្យកូនចៅក្រោមឱវាទ ឱ្យចាំប្រមូលលុយពីប្រជា ពលរដ្ឋដែលធ្វើដំណើរឆ្លងកាត់ព្រំដែន និងទារលុយពីប្រជាពលរដ្ឋលក់ដូររញ៉េរញ៉ៃបែបអនាធិបតេយ្យតាមដងផ្លូវឱ្យបាន ក្រាស់ក្រែល ដើម្បីចាយវាយផង និងទប់តួនាទីឱ្យបាននឹងន៎ផង បើមិនដូចនោះទេ ប្រាកដជាប្រឈមមុខទៅនឹងច្បាប់ ពុករលួយ និងបទបញ្ជានានារបស់ថ្នាក់លើថា ឱ្យមកបម្រើជាតិប្រជាជនចុះហេតុដូម្តេចបានឱ្យប្រជាជនមានភាពលំបាកទឹក ភ្នែកទៅវិញ ។
លើសពីនេះទៅ លោក ស៊ឹម សំអាត ជាប្រធានអន្តោប្រវេសន៍ប្រចាំច្រកអន្តរជាតិប៉ោយប៉ែតរូបនេះ បានបើកដៃឱ្យមន្ត្រីក្រោមឱវាទយ៉ាងពេញទំហឹងកំណត់តម្លៃធ្វើប័ណ្ណឆ្លងដែនតែលើបបូរមាត់ស្រេចតែចិត្ត គ្មានយោគយល់សោះឡើយ ដោយប័ណ្ណឆ្លងដែននេះថ្លៃចាប់ពី ១៣០០បាត ទៅ ១៥០០បាត ។ ចំពោះប្រជាជនលក់ដូរតាមដងផ្លូវ បែបអនាធិបតេយ្យនោះ ត្រូវបង់ពី ១៥០០បាត ទៅ ២ម៉ឺនបាត ។
ទាំងអស់នេះប្រជាពលរដ្ឋបានរិះគន់ធ្ងន់ៗចំពោះប៉ូលិសអន្តោប្រវេសន៍ច្រកអន្តរជាតិប៉ោយប៉ែត ដែលមានលោក ស៊ឹម សំអាត ជាប្រធាននោះ អង្គុយចាំតែទារលុយ គាបយកលុយ ប្រមូលលុយ កើបលុយពីប្រជាពលរដ្ឋដែលទៅធ្វើប័ណ្ណឆ្លងដែន ខុសពីតម្លៃសៀវកំណត់ដោយទារលុយថ្លៃទឹក ថ្លៃបាយ និងលុយុក្រោមតុផ្សេងៗទៀត ។
ប្រជាពលរដ្ឋសំណូមពរដល់នាយកដ្ឋានអធិការកិច្ច អគ្គនាយកដ្ឋានជនអន្តោប្រវេសន៍ នាយកដ្ឋានអធិការកិច្ចក្រសួង មហាផ្ទៃ អង្គភាពប្រឆាំងអំពើពុករលួយ និងអធិការកិច្ចទីស្តីការគណៈរដ្ឋមន្ត្រីនៃព្រះរាជាណាចក្រកម្ពុជា មេត្តាបង្កើតគណៈ កម្មាធិការត្រួតពិនិត្យលើករណីនេះផង ដើម្បីជាគំរូ និងធានាបានល្អនូវមុខមាត់ប៉ូលិសនានានៃព្រះរាជាណាចក្រកម្ពុជា ៕
