ខេត្តបន្ទាយមានជ័យ ៖ កន្លងមកថ្មីៗនេះ អាជីវករ កម្មករអូសរទេះ ពលករ និងប្រជាពលរដ្ឋកម្ពុជាទាំងអស់ ដែលបាន ចេញចូលឆ្លងកាត់ព្រំដែនពីប្រទេសកម្ពុចា ទៅប្រទេសថៃបានត្អូញត្អែររអ៊ូរទាំ ខ្លះស្រក់ទឹកភ្នែក នឹងអួលដើមក រាយការណ៍ប្រាប់ដល់សារព័ត៌មានយុត្តិធម៌ឱ្យដឹងថា ការចូលកាន់តំណែងរបស់លោកវរៈសេនីយ៍ ខឹម ចិត្រា ជាប្រធាន ប៉ុស្តិ៍នគរបាលអន្តោប្រវេសន៍ថ្មី ប្រចាំច្រកអន្តរជាតិប៉ោយប៉ែត បានប្រព្រឹត្តសកម្មភាពស្តែងចេញជាអំពើពុករលួយ ជះក្លិនបញ្ច្រាស់ខ្យល់ស្អុយគគ្រុកលើសអ្នកពីដឹកនាំមុនៗទ្វេដង ។
ក្រុមប្រជាពលរដ្ឋបានបន្តថា សកម្មភាពដឹកនាំដោយលោក ខឹម ចិត្រា ចូលកាន់តំណែងថ្មីជាមេប៉ុស្តិ៍ប៉ូលីស អន្តោប្រវេសន៍នៅច្រកអន្តរជាតិប៉ោយប៉ែត ដែលល្បីធុំក្លិនស្អុយគគ្រុកដោយប្រព្រឹត្តអំពើពុករលួយមិនប្រក្រតីដោយ បញ្ជាកូនចៅនគរបាលអន្តោប្រវេសន៍ក្រោមឱវាទឱ្យអនុវត្តន៍ដូចជា ៖
១-ជម្រិតយក ប្រាក់ពីពលរដ្ឋក្នុងម្នាក់ៗ៥០បាត(លុយថៃ)ឬស្មើនឹង៧០០០រៀលក្នុងការប្រថាប់ត្រាលើបណ្ណ័ព្រំដែន ចេញពីប្រទេសកម្ពុជា ចូលទៅ ប្រទេសថៃ តាមច្រកទ្វារអន្ថរជាតិប៉ោយប៉ែត។
២-ធ្វើលិខិត បញ្ជាក់១សន្លឹកតម្លៃ២០០បាតនិង៥០០បាតផ្សេងទៀត សម្រាប់ថតកាតចូល ប្រទេសថៃ ។
៣-ធ្វើលិខិតបញ្ជាក់១សន្លឹកតម្លៃ២០០បាតនិង៤០០បាតផ្សេងទៀត សម្រាប់ថតកាតចូលទៅដីថៃ ចំពោះពលរដ្ឋមកពីតាម បណ្ដាខេត្តក្រៅពីក្រុងប៉ោយប៉ែត។
៤-ជម្រិតយកលុយ៣០០បាតក្នុង ១ខែពីអ្នករត់ម៉ូតូឌុបនៅគល់ស្ពានមិត្តភាព កម្ពុជា-ថៃ។
៥-ជម្រិត ទារលុយពីអ្នករត់ម៉ូតូកង់៣ ម្នាក់៦០០បាទក្នុង១ខែ។
៦-ជម្រិតទារលុយពីអ្នកលក់ចំណីអាហារតាមរទេះរុញម្នាក់ក្នុង១ខែ ចាប់ពី ១៥០០ -២០០០ រហូតដល់៦០០០បាត ។ ហើយនៅក្នុងនោះផងដែរ ចំណុចទី៥និងទី៦ គឺលោកវរៈសេនីយ៍ឯក ទេព សម្បត្តិ នាយរងប៉ុ ស្តិ៍ ជាអ្នកក្ដោបក្តាប់សេដ្ឋកិច្ច ។
ប្រជាពលរដ្ឋមួយនាក់ក្នុងចំណោមប្រជាពលរដ្ឋជាច្រើននាក់ បានបន្តបន្ថែមទៀតថា ការប្រើប្រាស់ពាក្យគំរាម កំហែងជម្រិតទារប្រាក់ឲ្យបង់មិនប្រក្រតី គឺខុសច្បាប់ ។
ម្យ៉ាងទៀតយើងខ្ញុំសង្ឃឹមថា មេនគរបាលថ្មីនេះ បានមកបម្រើប្រជាពលរដ្ឋ គិតគូរយល់ដល់ផលប្រយោជន៍ សេចក្តីសុខទុក្ខប្រជាជន ហើយប្រព្រឹត្តសកម្មភាព អាជីវកម្មរកស៊ីបានស្រួលត្រឹមត្រូវ ទីបំផុតបានត្រឹមតែខកចិត្តអស់សង្ឃឹមទៅវិញ ព្រោះថា ពីមុនមានឈ្មោះ លោក ស៊ឹម សំអាត កាន់កន្លែងនេះ ប្រព្រឹត្តអំពើពុករលួយឃោរឃៅទារលុយឥតសំចៃ តែឥឡូវលោកវរៈសេនីយ៍ ខឹម ចិត្រា មកធ្វើមេប៉ូលីសអន្តោប្រវេសន៍ច្រកទ្វារអន្តរជាតិប៉ោយប៉ែត ប្រព្រឹត្តអំពើពុករលួយគំរាមកំហែងទារប្រាក់ពីប្រជាជន ក្រីក្ររកស៊ីត្រឹមត្រូវ លើសអ្នកមុនទៅទៀត នេះហើយដែលសុភាសិតខ្មែរយើងបានពោលថា “អាគកដូចអាចែ ១ដំបរ ស្មើនឹងបួន ”។
បើដូច្នោះយើងខ្ញុំជាប្រជាពលរដ្ឋស្លូតត្រង់រកស៊ីត្រឹមត្រូវដើម្បីជីវភាពគ្រួសារបានមួយថ្ងៃ ហូបមួយថ្ងៃ ដោយកម្លាំងកាយ កម្លាំងចិត្ត ដូច្នេះយើងខ្ញុំទាំងអស់សូមអំពាវនាវដល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ មេត្តាបង្កើតគណៈកម្មការដើម្បីពិនិត្យិស្រាវជ្រាវរកកំហុស និងដាក់ទោសទណ្ឌស្របតាមច្បាប់ដែលមានស្រាប់ ៕
