ខេត្តបន្ទាយមានជ័យ ៖ តាមប្រភពពីប្រជាជនខេត្តបន្ទាយមានជ័យ ក្រុងប៉ោយប៉ែតបានឱ្យដឹងថា លោក សី ស៊ីឡៃ ជាមន្ត្រីជលផល និង លោក ប្រាក់ ប៉ូលីមន្ត្រីសុរិយោដី បានយកដីផ្លូវសាធារណៈ ដែលប្រជាពលរដ្ឋប្រើប្រាស់ជារៀងរាល់ថ្ងៃ ធ្វើជាកម្មសិទ្ធិរបស់ខ្លួន ដោយសំអាងថា មានប័ណ្ណកម្មសិទ្ធិត្រឹមត្រូវ និងមានការទទួលស្គាល់ស្របច្បាប់ពីភូមិឃុំ។
ប្រជាពលរដ្ឋដែលជាអ្នករងគ្រោះជាង ១០០គ្រួសារ នៅក្រុម១៩ ភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត ចោទថាមន្ត្រី២រូបនេះបានរំលោភដីផ្លូវ ដែលប្រជាជនកំពុងធ្វើដំណើររាល់ថ្ងៃនេះ បែរជាបណ្តាលឱ្យប្រជាពលរដ្ឋមិនអាចធ្វើដំណើរទៅមកបានឡើយ។
ប្រជាពលរដ្ឋបានលើកឡើងថា ប៉ុន្មានថ្ងៃមុនប្រជាពលរដ្ឋបាននាំគ្នាយកដីទៅចាក់លើផ្លូនៅជិតដី មន្ត្រីទាំងពីរឱ្យរាបស្មើ ដើម្បីងាយស្រួលក្នុងការធ្វើដំណើរ ។ ប៉ុន្តែ កាលពីម្សិលមិញលោក ប្រាក់ ប៉ូលី បានគំរាមកំហែងមកលើចាប់ប្រជាពលរដ្ឋ និងបានបញ្ជាកូនចៅមកព័ទ្ធរបងលើដីផ្លូវតែម្តងយ៉ាងតល់ក្រហល់បំផុត។
ជនរងគ្រោះ ឌុន ពុទ្ធី បានប្រាប់ថា មន្ត្រីទាំងពីររូបនេះមានចេតនាពិតប្រាកដក្នុងការរំលោភយកដីផ្លូវ និងបានឃុបឃិតជាមួយអាជ្ញាធរដែលធ្វើការរំលោភលើច្បាប់គ្មានជំនាញច្បាស់លាស់ទាល់តែសោះ។
លោក ឌុន ពុទ្ធី បន្តថា ការបិទផ្លូវនេះធ្វើឱ្យប៉ះពាល់ដល់ការតប្រព័ន្ធទឹកស្អាត បណ្តាញអគ្គិសនី ជាពិសេសប្រសិនបើមានអគ្គិភ័យកើតឡើង នឹងជួបផលពិបាកក្នុងការពន្លត់ ពីព្រោះមិនមានផ្លូវចូល។ ហេតុដូចនេះ លោក រួមទាំងប្រជាពលរដ្ឋនឹងដាក់ពាក្យបណ្តឹងទៅតុលាការខេត្ត អភិបាលខេត្ត អង្គភាពប្រឆាំងអំពើពុករលួយ និង ក្រសួងនគររូបនីយកម្ម និងសំណង់ ដើម្បីជួយស្វែងរកដំណោះស្រាយរកយុត្តិធម៌ជូនប្រជាពលរដ្ឋរងគ្រោះជាជនស្លូត ត្រង់ ។
ពលរដ្ឋរងគ្រោះម្នាក់ទៀត លោក ប៊ុន នាង តំណាងប្រជាពលរដ្ឋជាច្រើនបានអះអាងថា ប្រជាពលរដ្ឋបានប្រើប្រាស់ដីផ្លូវនេះយូរមកហើយ ហេតុដូច្នេះប្រជាពលរដ្ឋបានធ្វើការតវ៉ាប្រឆាំង ដើម្បីទាមទារការបើកផ្លូវប្រើប្រាស់បន្ត។ លោកបន្តថា ក្នុងនាមជាមន្ត្រីមានជំនាញគួរតែប្រគល់ដីនោះ ជូនប្រជាពលរដ្ឋទុកសម្បត្តិសមូហភាពជាក្នុងការធ្វើដំណើរ ។ អាស្រ័យផលប្រចាំថ្ងៃស្របតាមគោលនយោបាយកាត់បន្ថយភាពក្រីក្ររបស់រាជរដ្ឋាភិបាល ។
បើសិនលោកទាំងពីរ លោក សី ស៊ីឡៃ និងលោក ប្រាក់ ប៉ូលី មិនប្រគល់ដីនោះទុកជាផ្លូវសម្រាប់ទ្រព្យ សម្បត្តិរដ្ឋសម្រាប់ប្រជាជនធ្វើដំណើរទេនោះ លោកទាំងពីរប្រាកដមានឈ្មោះអ្នករំលោភយកដីផ្លូវមានឈ្មោះអ្នក រំលោភច្បាប់ហើយអាចប្រឈមនឹងច្បាប់ ដែលធ្វើឱ្យរដ្ឋាភិបាលមានឈ្មោះថា មិនគោរពច្បាប់ហើយ ។
រីឯលោកចៅសង្កាត់រងប៉ោយប៉ែតទី ២ គឺ មានប្រសាសន៍ថាដីនោះជាដីផ្លូវហើយត្រូវបានមន្ត្រីទាំងពីររំលោភ ពិតប្រាកដមែន។ លោកបន្តថា លោកកំពុងស្វែងរកឯកសារពាក់ព័ន្ធឱ្យបានគ្រប់គ្រាន់សិន មុននឹងចុះធ្វើអន្តរាគមន៍ ៕
